Paxta Tuyabo‘g‘iz suv omborini qanday «ichib» yuboradi

Ma'lumki, Toshkent dengizi Toshkent viloyatidagi gidrotexnik inshootdan boshqa narsa emas — Ohangaron daryosining o‘rta oqimidagi suv ombori. U Ohangaron va Chirchiq daryolarining suv resurslarini mavsumiy tartibga solish maqsadida qurilgan. Bu suvlar esa sug‘orish ehtiyojlariga ketadi. Tuyabo‘g‘iz suv ombori Bo‘ka, Oqqo‘rg‘on, O‘rtachirchiq va Quyichirchiq tumanlarini sug‘orish uchun suv bilan eng yaxshi ta'minlaydi. Biroq Toshkent dengizi qirg‘oqlarida dam olish zonasi ham barpo etilgan. Bu yerga oilalar, do‘stlar davralari, yosh kelin-kuyovlar va yolg‘izlar keladi. Va har kim o‘zining shinam burchagini topadi. Toshdengiz havaskor baliqchilar orasida ham mashhur, chunki uning suvlarida ilonbosh, sazan, laqqa va boshqa yirik baliqlar yashaydi. O‘tgan yili u yerda hatto meduzalar ham paydo bo‘ldi — ularga, ehtimol, karantin bilan bog‘liq sukunat va suvdagi, odatda inson buzadigan, osoyishtalik ma'qul kelgandir. Bu nozik jonzotlar, ehtimol, yozda Toshdengiz suvi sug‘orishga olinganda birinchi zarbani o‘z zimmasiga oladi. Qirg‘oq bo‘ylab joylashgan dam olish zonalariga ham undan kam bo‘lmagan zarba yetadi. Suv asta-sekin chekinib, tubini ochib qoldiradi va ajoyib akvamarin manzarani loyqa-jigarrang, botqoqlikka aylantiradi. Bunday manzara bu yerga hatto mahalliy sayyohlarni ham jalb eta olishi dargumon, yaqin va uzoq xorijdan keladigan mehmonlar haqida gapirmasa ham bo‘ladi. Toshdengiz — Toshkent viloyati va umuman O‘zbekistonning diqqatga sazovor joylaridan biri. Xo‘sh, uning qirg‘og‘idagi kurortlar gullab-yashnash uchun haqiqiy imkoniyatga ega bo‘lmasligi qanday izohlanadi? Nahotki texnologiyalar rivojlangan asrimizda dalalarni sug‘orishning boshqa yo‘lini topib bo‘lmasa yoki sug‘orish tizimini suv ombori zarar ko‘rmaydigan qilib hisoblab bo‘lmasa? Yevrostandart talablariga mos dengiz turizmini tashkil etishning ajoyib imkoniyati borligi, ammo tadbirkorlar, shubhasiz, hal etsa bo‘ladigan qiyinchiliklarga duch kelayotgani nihoyatda achinarli. Ularni yengib o‘tsak, bizda tegishli jihozlangan plyajlar, ijaraga beriladigan shezlong, tent, yotoqcha, to‘p va havo to‘shaklari kabi xizmatlar bo‘lardi. Shu bilan birga dam oluvchilar uchun qulay, doimo yangilanib turadigan kottejlar va xonalar, ajoyib oshxonalar, kafelar, restoranlar, tarqatib sotiladigan ichimliklar. Yana kater, qayiq, katamaran ijarasi. Ro‘yxatni uzoq davom ettirish mumkin, biroq bularning barchasi asosida shular yotadi: dam oluvchilar uchun salomatlik va immunitetning ko‘tarilishi, shuningdek tadbirkor uchun foyda. Pirovardida, bu — xazina uchun ko‘taruvchi to‘lqin, chunki dam olish zonalarida sharoit yaxshilanishi soliq to‘lovchilar sonining ortishiga olib keladi. Ularning farovonligi — umuman mamlakat ravnaqiga ulkan hissa. Ammo bu — agar bu masala kimnidir jiddiy qiziqtirgan taqdirdagina shunday bo‘ladi. Avvalo, O‘zbekiston turizm biznesining gullab-yashnashidan manfaatdorlarni.